Nos chants en vidéo
Voici notre première vidéo en chanson, le début d’une belle et longue série…
ODE MONTOISE AU P’TIT BOLOME PICHEUR
E’j’ ris qu’in j’pinse au p’tit bolome tout nu, tout pot’lé, tout frisé qu’t’es !
Eié qué les geins dépuis tois sièques passent leu timps à essayer dé t’rhabiller !
Forcémint puisqué t’es ein p’tit bolome dé fontaine, pou print’ ette bain, pou jwer à l’iau, normal qué tu sois desbillé .
Pour nous, c’est l’même, on n’prind nié no bain, on n’pique nié en’ tiete dins l’iau avec no loque à no dos.
Eié in s’tant tout nu, t’es ène bonne arsouille. Y’a ein fin contint’mint su’t visache, comme ène risette in coin, tout in pichant ainsi su les siens qui t’argardent.
Est-ce qué tu t’foutrois d’nous autes ? L’air dé rié , c’est comme si tu no disois : « Mi j’peux l’faire, éié vous non !
C’est vrée, non, pou ein homme qu’in f’roit ène parelle, on criroit au sale bouc , à l’attintat a’l’ pudeur.. Pou ein d’jambot on lui diroit d’habie s’artourner, qué ca n’sé fait nié ; il risquoit même en’ tape dins s’fosselette ou ailleurs. Mais pou ti aute, nom dé zos, c’est tout l’contraire : y a toudis ein fameux monciau d’geins pou t’raviser.
J’comprinds qué t’aime el compagnie. Tout seu pas tous les temps c’est tout seu. Ouais mé, tout nu pas tous les temps c’est co pu pire ! Tu dois d’jà iette mort ingélé ainsi qu’el Toussaint r’viét.
Oh bé ça, mais j’comprinds toute. J’viés d’avoir ène zillumination : c’est cont’ el vint d’bise, les ingélures éié l’morf’ à’t’nez ,qué des brafs geins ont pinsé dépuis tois sièques à mette ène saqué su’t’dos !
Ca faite qué comme no autes, on t’a baillé el’pétit costume bleuse qué t’a su’t’dos tout maint’nant, c’est qu’on est ène miette brafs étou.
No bon patron, Sin Crépin, doit iette binaise dé nous. Eié no Sin Crépin, qu’étoit choumaque d’es’ métier, si il avoit été ci asteur, dès qu’il aroit vu tes artouilles striquer d’foidure, i’ t’aroit faite in chinq sept ène pétit’ paire dé solées fourrées !
E’j’ris qu’in j’pinse au p’tit bolome tout nu, tout pot’lé, tout frisé qu’t’es !
A travers ti, j’arvois d’autes bolomes tout nus, tout pot’lés, tout frisés qui t’archennent.
Cé sont les ing’lots dé no n’église sin Nicolas dé Mons. Ti in bronze, ieuses in bois. Pou ieuses, jamé au grand jamé en’âme qui vive n’a proposé dé mucher leu nudité !
Mais il l’a ène grinde différince intré vous. Ieusses ils l’ont à belle à l’intérieur éié ti , hivier comme été, tu d’meur’s stampé a’l’porte su’t’perron.
Faites comme no autes, m’sieur, dames, ayez pitié des geins qui sont toudis à l’huche….